Gipahigayon sa Davao de Oro Police Provincial Office ang seremonya sa Day of National Remembrance niadtong Biyernes sa ilang headquarters, diin nagtigom ang mga kawani sa probinsya ug mga kapulisan aron pasidunggan ang 44 ka miyembro sa Special Action Force (SAF) nga nangamatay atol sa pagtuman sa ilang katungdanan.
Gisugdan ang kalihokan pinaagi sa solemne nga pag-ampo alang sa mga namatay, uban ang aktibong partisipasyon sa mga kapulisan gikan sa nagkadaiyang bahin sa probinsya.
Sa iyang mensahe, gihulagway ni PCOL Cesario D. Dukiling Jr., Provincial Director, ang SAF 44 isip simbolo sa kaisog, dedikasyon, ug sakripisyo, ug gihangyo ang mga kapulisan nga ipadayon ang ilang panulondon pinaagi sa integridad, propesyonalismo, ug matinud-anong pag-alagad sa katawhan.
Natapos ang kalihokan pinaagi sa hilom nga pagpamalandong, diin gipamatud-an sa mga personnel ang ilang dedikasyon sa serbisyo ug sa nasodnong kaluwasan, samtang misaad nga ipadayon ang handumanan sa SAF 44 pinaagi sa panaghiusa, pag-alagad, ug dungog.(Camille Santos Naraga)(DSource: Contributed)