DAVAO CITY – Kritikal ang kahimtang sa usa ka Police Executive Master Sergeant human gidunggab sa mata sa suspek nga iyang girespondihan sa Barangay Milagrosa, Sta. Catalina, Miyerkules sa gabii, Setyembre 3, 2025.
Base sa imbestigasyon, nagreklamo ang 58-anyos nga tindera og sari-sari store nga gisamdan sa suspek human kini nagdumili nga mobaligya kaniya og ilimnong makahubog. Nasuko ang lalaki tungod sa pagdumili ug nagsugod kini og pangamok hangtod iyang gisamdan ang babaye og pito ka higayon.
Sa pag-abot sa pulis aron modakop, kalit siyang giatake ug gidunggab sa mata, nga nakaigo sa usa ka major artery. Gidala dayon siya sa ospital ug kasamtangang giandam alang sa operasyon.
Ang 58-anyos nga biktima sa tindahan gidala usab sa ospital ug nag-antos og pito ka samad pinagsaksak. .(Camille Santos Naraga)(Source: Contributed)