Gikumpirma sa mga otoridad nga ang patay’ng lawas nga nakaplagan ubos sa Talomo Bypass Road Bridge sa Bangkal, Davao City, pasado alas 10 sa buntag niadtong Mayo 23, mao ang 31-anyos nga lalaki nga gi-report nga missing.
Ang biktima giila nga si Medcynric, kilala sa alyas nga “Paloy,” ulitawo ug tricycle driver nga taga-San Antonio, Agdao, Davao City.
Sumala sa imbestigasyon sa Talomo Police Station, ang lawas unang nakit-an sa usa ka 13-anyos nga batang lalaki nga namasol sa daplin sa sapa. Matod sa batan-on, nasimhotan niya ang baho gikan sa patay’ng lawas, hinungdan nga gitawag dayon ang mga otoridad.
Gipahayag usab sa usa ka trabahador sa duol nga construction site nga si Samuel, 40 anyos, nga nakita niya si Paloy nga naglingkod sa daplin sa sapa niadtong Mayo 20. Ilang gihagad og pagkaon ang biktima, apan wala kini motingog ug nilakaw nga daw wala sa kondisyon.
Nasayran pa nga ang biktima mihawa sa ilang balay niadtong Mayo 18, base sa pahayag sa iyang ig-agaw nga si Mary. Giingon usab nga nag-antos og kasubo si Paloy human sa kamatayan sa iyang amahan.
Walay nakit-ang ilhanan sa foul play ang SOCO team sa lugar sa insidente. (Camille Santos Naraga)(Source: DCPO)