DAVAO CITY – Malampuson nga nakaluwas ang mga tropa sa Marine Battalion Landing Team-9 (MBLT-9) sa tulo ka mga mangingisda nga nahimong stranded sulod sa halos duha ka adlaw sa West Philippine Sea niadtong Domingo, Septyembre 7, 2025.
Base sa report, nabulag ang mga mangingisda sa ilang mother boat human masangit sa kusog nga balod, nga nakaingon nga nag-anod sila hangtod nakit-an sa mga marine forces nga nagpatrolya.
Ang mga nailhan nga naluwas mao sila si Romeo Carta, 50; Rojin Santillan, 28; ug Axel Gonzaga, 30, tanan mga residente sa Barangay San Piro, Malayan, Batangas.
Dayon silang gihatagan og medical attention ug tabang sa walay paglangan ug gisiguro nga luwas nga naturn-over sa lokal nga mga otoridad.
Gidayeg usab sa Philippine Marine Corps ang paspas nga aksyon sa MBLT-9, nga nagpakita sa ilang dedikasyon sa maritime security, kaluwasan sa mga mangingisdang Pilipino, ug pagpanalipod sa teritoryal nga katubigan sa nasud.(Camille Santos Naraga)(Source: Contributed)