Nadakpan ang usa ka 28-anyos nga lalaki human masakpan nga misulay og pasulod og gituohang ilegal nga droga sa custodial facility sa New Bataan Police Station niadtong Sabado, Pebrero 7, 2026.
Sumala sa report sa kapulisan, nasakpan ang suspek atol sa routine body search sa wala pa kini gitugotan nga makasulod sa police station. Nagpakaaron-ingnon lamang ang lalaki nga mobisita sa usa ka detainee, apan nadiskobrehan nga adunay gitagong gituohang shabu sa iyang lawas.
Gipasabot sa kapulisan nga padayon ang ilang imbestigasyon sa insidente ug gipangandaman na ang angay nga mga kaso batok sa suspek subay sa mga balaod batok sa ilegal nga droga.