DAVAO CITY – Misukol si Sultan Kudarat Governor Datu Pax Mangudadatu sa nagkapatuyang batikos sa social media nga nag-angkon nga sobra kuno ang pondo nga gigahin sa probinsya alang sa Kalimudan Festival 2025.
Ubang netizens miingon nga mas maayo unta gamiton ang maong pondo sa mga programa para sa mga kabus imbes sa usa ka dagkong festival.
Apan gitubag kini sa gobernador, nga nagkanayon nga bakak ug layu sa kamatuoran ang mga pasangil. Gipasabot ni Mangudadatu nga transparent ang tanan nga paggasto sa Kapitolyo ug tin-aw nga ang Kalimudan Festival dili lamang kalipay-kalipay, kondili usa ka dako nga economic activity nga nakatabang sa local businesses, cultural organizations, ug sa industriya sa turismo.
Iyang gipunting nga daghang ongoing projects alang sa social welfare ug health assistance ang nagpamatuod nga padayon ang suporta sa probinsya para sa mga kabus—lakip na ang bag-ohay lang nga distribusyon sa prosthetics.
Giawhag sa gobernador ang publiko nga tan-awon ang long-term benefits sa festival, nga nagmugna ug trabaho, nagdasig sa negosyo, ug nagpalig-on sa cultural pride sa katawhan sa Sultan Kudarat. .(Camille Santos Naraga)(Source: Contributed)