DAVAO CITY — Nadiskubre ang mga patay’ng lawas sa usa ka babaye ug usa ka lalaki sulod sa usa ka boarding house sa del Pilar Street, Jerome Extension, Barangay R. Castillo, niadtong Mayo 13, 2025.
Nakit-an ang insidente human masayod ang usa sa mga boarder sa buslot sa bongbong diin nakita niya ang lawas sa lalaki. Gilayon kining gisumbong sa landlady nga dayong mitawag sa mga otoridad.
Sa pagsusi sa kapulisan, ilang nakita usab ang lawas sa usa ka babaye nga giilang si alyas Jelai, gi-estima nga 23–30 anyos, ug usa ka security guard nga taga-Mabini, Koronadal City, South Cotabato.
Ang babaye adunay samad-pusil sa tuo nga bahin sa ulo, susama sa samad nga nakita sa lalaking biktima nga hangtod karon wala pa mailhi. Ang lalaki gibanabanang 20–30 anyos, may taas nga 5’4”–5’6”, ug adunay tattoo sa dughan.
Base sa CCTV footage nga gisusi sa kapulisan, miabot si Jelai sa boarding house nag-inusara pasado alas 3:19 sa kadlawon. Pagka alas 3:37 sa buntag, usa ka lalaki nga wala mailhi ang nakita nga naglagot-lagot sa gawas sa boarding house ug pagkahuman, misulod sa kwarto ni Jelai alas 3:38. Sa alas 3:40, migawas siya apan mibalik dayon ug human ana, nadungog ang pagbuto sa pusil.
Sa crime scene, narecover sa kapulisan ang usa ka 9mm kalibre nga pistola nga adunay duha ka magazine, duha ka basiyo, duha ka cellphone nga gituohang iya sa mga biktima, usa ka itom nga Aerox motorcycle, ug ubang personal nga gamit.
Nagpadayon ang imbestigasyon sa kapulisan aron masuta ang motibo sa krimen ug mailhan ang suspek.(Camille Santos Naraga)(Source: Contributed)