DAVAO CITY – Mas napaligon pa ang operasyon sa Davao City Muslim Affairs Office sa pag-alagad sa komunidad human kini opisyal nga nakadawat og duha ka bag-ong sakyanan nga gi-finance sa City Government of Davao.
Ang dugang nga mga unit naglakip sa usa ka patient transport vehicle, nga gamiton sa paghatod sa mga pasyente ngadto sa mga ospital ug ubang pasilidad pang-lawas, ug usa ka multipurpose vehicle nga ipang gamit sa lain-laing programa sa komunidad ug emergency response.
Gipasalamatan ni Deputy Mayor Gabriel Nakan ang lokal nga panggamhanan ug iyang giingon nga ang mga sakyanan dako’g tabang sa pagpaayo sa serbisyo alang sa Muslim community sa dakbayan. Dugang pa niya, makatabang kini sa mas paspas nga pagresponde ilabi na panahon sa medikal nga emerhensiya ug uban pang panginahanglanon sa komunidad.
Ang turnover nagpakita sa padayon nga suporta sa City Government sa kaayohan ug kaluwasan sa tanang sektor, lakip na ang mga Muslim residente sa Davao City.(Camille Santos Naraga)(Source: City Government of Davao)