Davao City – Kasamtangan karong gipatuman sa lokal nga panggamhanan sa siyudad sa Dabaw ang paglimita sa paghatag ug libreng swab test alang sa si kinsa man nga matumbok sa contact tracing. Kini gumikan na usab sa ka-limitado sa suplay sa detection kits.
Gipamahayag ni Davao City Mayor Sara Duterte nga ang mga F1 kun first generation contacts na lamang sa mga kumpirmadong covid-19 case ug kadtong dunay simtomas sa covid-19 maoy maka-avail sa ihatag nga libreng RT-PCR swab tests sa Davao City LGU.
Matud pa usab ni Mayor Sara nga gawas sa limitado na ang supply sa detection kits, daot ug under repair usab ang extraction machine sa Southern Philippines Medical Center. Dugang sa Mayor nga dunay procurement ang lokal nga kagamhanan apan mataud-tauran pa kini gumikan kay kinahanglang muagi sa proseso subay sa balaod.
Samtang, suspendido usab ang Surveillance ug Community swab test.
Alang sa mga Dabawenyo nga nahulog isip F2 ug F3 mamahimo silang magpa swabtest sa mga private laboratories.
Subay sa Davao City executive order no. 20 series of 2021, tanan nga mga F1, F2 (second generation contact) ug F3 (third generation contact) sa usa ka COVID-19 patient kinahanglang mupaubos sa mandatory swabbing.
(Source: Davao City Information Office)