DAVAO CITY — Duha ka bata ang namatay samtang usa pa ang padayon nga gi-obserbahan sa ospital human madat-ugan sa nahugmak nga pader nga naigo sa punoan sa kahoy sa Park 10, Doña Salud, Km 10, Sasa, Davao City.
Base sa imbestigasyon sa Sasa Police Station 4, nakadawat sila og tawag gikan sa Central 911 mahitungod sa natumbang punoan sa kahoy nga miigo sa pader ug nakadangat sa insidente diin naigo ang tulo ka menor de edad.
Gipang-ila ang mga biktima nga sila Paul John Dahan Pastera, 10 anyos; Marcus Romagos Pagal, 7 anyos; ug Paula Rhiane Suan, 10 anyos — tanan residente sa maong lugar.
Sumala sa amahan ni Marcus nga si Marvin Pacres Pagal, nagdula ang tulo ka bata duol sa usa ka abandonadong balay dihang kalit nga natumba ang kahoy tungod sa kusog nga hangin. Ang kahoy naigo sa pader nga midangat sa pagkahugno niini ug midat-ug sa mga bata.
Gidali silang gidala sa Southern Philippines Medical Center (SPMC) apan Dead on Arrival si Marcus. Si Paul John namatay alas 11:30 sa gabii sa samang adlaw. Si Paula Rhiane, sa laing bahin, padayon nga ginatambalan ug giobserbahan sa mga doktor.
Anaa na karon sa punerarya ang mga patay’ng lawas sa duha ka biktima. (Camille Santos Naraga)(Source: Contributed)