Naospital ang usa ka 18-anyos nga lalaki human kini gidunggab sa iyang kainom alas 12:45 sa kaadlawon niadtong Pebrero 10, 2026, sa Sitio Maisa, Barangay Cabadiangan, Kadingilan, Bukidnon.
Sa police report, nag-inom ang biktima ug ang suspek nga si alyas “Dagang,” 30-anyos, sa dihang kalit lang nga gidunggab ang biktima gamit ang garab sa wala pa matino nga rason samtang mangatulog na unta sila.
Nakaikyas ang biktima ug nakapangayo og tabang sa mga silingan. Nakabaton kini og mga samad sa lawas apan luwas na ang kahimtangan niini karon ug nakaangkon na og medical attention.
Samtang, wala pa nadakpan ang suspek ug nagpabiling gawasnon samtang nagpadayon ang imbestigasyon sa kapulisan.(Camille Santos Naraga)(Source: Contributed)