DAVAO CITY – Usa ang patay ug tulo ang nasamdan human mawadan og kontrol ang usa ka garbage truck sa padulhog nga dalan sa Bacaca Road, Barangay 19-B, alas-10 sa gabii, Setyembre 17, 2025.
Ang truck, gimaneho ni Marix Del Mar Mutia, 42 anyos, residente sa Tres de Mayo, Digos City, naghunong aron mangolekta og basura ug gibutangan og kahoy nga kalso. Apan wala kini magsilbi, hinungdan nga midaus-os ang truck padulong sa kanto sa JP Laurel Avenue ug Bacaca Road.
Una niini, nabanggaan ang usa ka motorsiklo nga gimaneho ni Leneth Abella Llanto, 45 anyos, taga Awhag Subdivision, Bajada, ug pagkahuman usa ka kotse nga gimaneho ni Joshua Mamac Reyes, 25 anyos, taga El Rio Subdivision, Bacaca.
Padayon nga milahos ang truck ug mibangga sa usa ka tindahan ug lechon house sa lugar. Didto, gideklarang patay si Ainal Cañas Mohamad, 27 anyos, taga Lupon, Davao Oriental, nga naa sa sulod sa lechon house. Samtang ang senior citizen nga si Malborin Rada, nga naa sa sulod sa tindahan, nasamdan.
Ang motorcycle rider ug driver sa kotse naapil sab sa mga nasamdan ug gidala dayon sa ospital sa miresponding medical team gikan sa Central 911.(Camille Santos Naraga)(Source: Contributed)