Naaresto ang usa ka lalaki nga gituohang nagabaligya og pinaugang marijuana atol sa drug buy-bust operation nga gipahigayon sa mga operatiba sa Philippine Drug Enforcement Agency (PDEA) Region XI ug Ecoland Police Station 15, pasado alas 6:03 sa gabii, Hunyo 30, 2025, sa Purok 1, Barangay Manuel Guianga, Tugbok District, Davao City.
Giila ang suspek nga si alyas “Jose,” 31 anyos, residente sa maong barangay.
Base sa report sa PDEA-XI, napalitan ang suspek og usa ka kilo sa gituohang pinaugang dahon sa marijuana nga gibalor og ₱20,000 sa usa ka poseur buyer nga ahente sa PDEA.
Gikumpirma usab nga nasikop kini nga adunay upat ka sachet nga adunay sulod nga pinaugang marijuana, nga mokantidad og ₱1,500.
Nabawi sa mga otoridad ang marked money ug nakumpiska usab ang motorsiklo nga gigamit sa suspek sa ilegal nga transaksiyon. .(Camille Santos Naraga)(Source: Contributed)