Gibutyag ni Doc Armie Capuyan, focal person sa African Swine Fever (ASF) sa Department of Agriculture (DA-XI) nga nagpabiling hulga sa Davao Region ang ASF nga usa ka sakit sa hayop nga baboy hangtud nga wala pa’y epektibong bakuna nga madiskubre nga maoy muhatag proteksyon sa mga baboy sa tibuok kalibutan.
Atol sa virtual presser sa AFP PNP press corps, gipamahayag usab ni Doc Capuyan nga hangtud karon mahimong pangontra nato sa ASF mao ang istriktong implementasyon sa biosecurity measures.
Usa sa mga lakang nga gipakusgan sa gobyerno mao ang pag-kontrola nga dili makasulod sa usa ka lugar ang ASF, apan kung masudlan man, angay dayon kining hatagan ug aksyon aron dili na mokatag pa sa laing lugar.
Alayon niini, gi-awhag usab ni Capuyan ang mga Local Government Units (LGUs) nga dili balewalaon ang ASF ug angay nga padayong pakusgan ang pagbantay sa mga border control ug ipatuman ang hugot nga quarantine measures aron makontrol ang ASF sa Davao region.
Dinhi sa dakbayan sa Davao, kontrolado na sa pipila ka mga barangay ang pagkatag sa ASF sukad niadtong Pebrero sa tuig 2020 subay sa City Veterinary Office.
Matud ni Dr. Cherrie Rayos, Assistant City Veterinarian nga wala nay na detek nga ASF sa siyudad, apan padayon gihapong gipakusgan ang monitoring sa mga baboy ilabi na gikan sa mga lugar sa Regions 10, 13 kon Caraga Region ug kasikbit nga mga probinsya.
Nagmontar usab ug monitoring posts ang City Veterinary Office sa Task force Davao checkpoints sa Sirawan, Toril; Lacson, Calinan; ug Lasang sa Bunawan District ning siyudad.
(Source: DA-XI Public Information Office)
