Gipatuman na karon sa pito (7) ka lungsod sa probinsya sa Sarangani ang curfew isip panagana sa bahad sa Coronavirus. Sa direktiba ni Governor Steve Chiongbian Solon ngadto sa mga mayor, nagpatuman og curfew hours ang mga munisipyo kadaghanan gikan alas nuybe sa gabii (9pm) hangtud alas kwatro sa kadlawon (4am).
Segun ni Police Lt. Col. Teody Condesa, spokesperson sa Sarangani Provincial Police Office, epektibo sa kapulisan ang pag-implementa sa curfew entiro Sarangani Province. Gikinahanglan matud pa nga mu-kooperar aron dili malisdan sa pagpanghipos ang mga residente ug ang mga gapang-tinda matag gabii.
Wala kini laing katuyuan kundili ang kaayuhan sa tanang mga taga-Sarangani aron dili makuha ang virus pinaagi sa tapok-tapok sa tao. Gani, sa Executive Order No. 6 series of 2020 nga gipirmahan ni Governor Solon, gibawalan ang pag-byahe kung dili man lang importante aron makalayo sa panagtapok.
Gihangyo ni Governor Solon nga maayo magpuyo una sa balay dili magsuroy-suroy aron walay kabalhinan ang virus. Mugamit og face mask kung adunay gibati sa lawas. Samtang, “social distancing” ang gi-rekomenda sa Department of Health usa (1) ka metro ang distansya kung adunay kaisturya o katapad panagana sa air droplet nga manglupad sa kahanginan.
Gipaklaro na lamang ni Doctor Arvin Alejandro, ang provincial health officer, nga kadtong mga taga-Sarangani nga ma-admit tungod gikonsidera nga PUI o person under investigation ang paga-abagahon sa Sarangani Provincial Government ang ilang magasto sa pagpa-ospital masiguro lang nga mu-kooperar sila sa lokal nga gobyerno, subay kana sa kamanduan ni Governor Solon. Gani, ubay-ubay na nga mga PUI sa Sarangani ang nakagawas sa hospital human nagpaayo ug nag-negatibo sa Coronavirus. Samtang, padayon ang pahimangno sa PHO Sarangani nga kanunay manghugas og kamot gamit ang sabon kung walay alcohol ug hand sanitizer.