Cebu City – Gihimakak sa kagamhanang lokal sa Syudad sa Lapu-Lapu nga way medical staff ang Hoops Dome nga gihimong isolation facility, diin gibutang ang mga asymptomatic sa Covid-19 nga mga pasyente.
Giluwatan ni Mayor Junard Chan ang maong pamahayag human sa kamatayon sa usa ka pasyente sud sa facility niadtong Marso 19, 2021 ug human sa mitumaw nga pasangil nga way medical personnel nga mi respondi dayon sa pasyente sa dihang na collapse kini.
Ang nahisgutang insidente maoy nag aghat sa pamilya sa pasyente sa ilang panawagan sa kagamhanan sa Dakbayan sa Lapu-Lapu pag reevaluate sa ilang pagduma sa Hoops Dome ug paghatag ug higayon nga maka pili sa ilang isolation facility.
“Dili tinuod nga walay medical staff ang atong isolation facility sa Hoops Dome. Naay duha ka nurses nga na assign didto,” mensahi ni Chan labot sa isyu.
Gibutyag ni Chan nga kadtong adlawa mo-graduate na unta siya (pasyente) unya requirement man sa mga mo abroad nga negative gyud sila sa RP-PCR test.
Matod sa Mayor nga samtang nagpaabot nikalit lang nga ni-collapse ug basi sa record, nasutan nga cardiac arrest ang namatyan.
Giila ang pasyente nga si Ramon Castro, 36, residente sa Dakbayan sa Toledo ug na isolate siya sa Lapu-Lapu gumikan kay siya ug ang iyang asawa nga si Jojean nag istar sa usa ka hotel sa syudad samtang nag paabot sa resulta sa unang swab test ni Castro.
Si Castro nag andam sa mga requirements alang sa iyang pagbalik sa Saudi diin siya nag trabaho isip OFW.
Dihang nasuta nga nag positibo sa Covid-19 si Castro pagka Marso 11, gikuha kini sa personnel sa Lapu-Lapu gikan sa hotel ug gidala sa Hoops Dome.
Sigon pa ni Chan nga basi sa iyang record sa facility, normal ra man ang iyang daily vital signs sama sa blood pressure ug oximeter level.
Gani, matod pa sa mayor nga pag-abot niya sa facility, normal ra siya, walay problema sa breathing.
Gibutyag ni Chan nga standard procedure sa Lapu-Lapu nga ang asymptomatic nga mga pasyente i isolate sa Hoops Dome.
Sa iyang bahin, si Jojean mi request nga tugtan unta si Castro nga anha ma isolate sud sa hotel, apan gibalibaran ang iyang hangyo.
Apan suma pa sa mayor nga ang hotel nga gi-istaran sa magtiayon wa kini gi designate nga Covid-19 quarantine o isolation facility. (Jhon Tadlip/JTY)
(Source: Lapu-Lapu City Public Information Office)