Usa ka trahedya ang nahitabo sa Sitio Timubo, Barangay Cabungaan, lungsod sa San Francisco, isla sa Camotes, diin usa ka magtiayon nga vegetable vendor ug usa ka minor de edad ang gipusil patay sa ilang silingan niadtong alas 11:50 sa gabii sa Huwebes, Desyimbre 12, 2024.
Ang mga biktima giila sa San Francisco Police Station na mao sila si Bernardo Sampan, 42-anyos, iyang asawa nga si Narsisa Sampan, 41 anyos, ug ang ilang kauban sa balay nga si Cleah Nicole Villamor, 14-anyos.
Sumala sa pasiunang imbestigasyon, ang suspetsado mao si alias “Randy”, kinsa posibleng nasuko sa magtiayon tungod kay gipaningil sa utang nga wala nila mabayri. Ang magtiayon dili lamang mamaligya ug utanon, apan nagpatanto usab kini og kwarta.
Ang mga kabanay sa biktima nag-ingon nga wala sila magdahom nga mahitabo kini nga insidente. Matod nila, hilumon ug matinabangon ang magtiayon. Ang menor de edad nga si Cleah Nicole usa ka paryente sa magtiayon ug nagpuyo kauban kanila.
Ang kapulisan sa San Francisco padayon karon sa pagpangita sa suspetsado nga si alias “Randy,” kinsa nilayas human sa krimen. Nagpadayon usab ang imbestigasyon aron masuta ang dugang kasayuran kabahin sa motibo ug sa mga panghitabo sa krimen. (Renante Socia Lada)