Nasikop ang tulo ka Most Wanted Persons sa probinsya sa nagkadaiyang operasyon sa kapulisan sa Cebu ug Bohol sa Marso 10, 2026, isip kabahin sa padayon nga kampanya sa kapulisan batok sa mga kriminal nga adunay warrant of arrest.
Ang unang nadakpan mga 10:00 sa buntag sa Tagbilaran City, Bohol. Nadakpan ang suspek nga giila sa alyas “Johnrey,” nga Top 7 Provincial Most Wanted Person, sa Barangay Cogon.
Gipasanginlan siya sa kasong lascivious conduct ubos sa Republic Act 7610 nga may piyansa nga ₱108,000.
Mga 12:30 sa udto, nadakpan usab sa kapulisan sa Naga City, Cebu ang suspek nga giila sa alyas “Klentoy,” nga Top 8 Provincial Most Wanted Person, sa Barangay Langtad.
Gipasanginlan siya sa paglapas sa Sections 5 ug 11 sa Republic Act 9165 o Comprehensive Dangerous Drugs Act. Wala nay piyansa nga gitakda sa korte alang sa maong kaso.
Samtang mga 4:00 sa hapon, nadakpan usab sa kapulisan sa Barangay Candulawan, Talisay City, Cebu ang suspek nga giila sa alyas “Jason,” nga Top 6 Provincial Most Wanted Person.
Nag-atubang siya sa duha ka kaso sa acts of lasciviousness ubos sa Republic Act 7610 nga adunay piyansa nga ₱200,000.
Sa pagkakaron, ang tulo ka nadakpan nga mga suspek gibutang sa nagkalain-laing police custodial facilities samtang gihulat ang sunod nga proseso sa korte.
Gidayeg ni Police Brigadier General Redrico A. Maranan, regional director sa Police Regional Office 7, ang mga operatiba tungod sa ilang paspas ug hiniusang operasyon aron madakpan ang mga wanted persons.
Dugang pa niya, padayon ang kapulisan sa pagduso sa hustisya ug gihangyo usab ang publiko nga motabang pinaagi sa paghatag og tukmang impormasyon batok sa mga kriminal.
Source: PRO7 PIO
I via Renante Socia Lada