Malampuson ug malinawon nga nahuman kagahapong adlawa Septiyembre 13 ang 2026 Bar Examinations sa University of San Jose-Recoletos (USJ-R) Basak Campus sa Cebu City, nga walay natala nga insidente.
Gipangulohan sa Police Regional Office 7 (PRO7) ang security operation pinaagi sa sayo nga pagpangandam, husto nga pag-deploy sa mga personnel, padayon nga pag-monitor ug koordinasyon sa nagkadaiyang ahensya.
Mga 1,500 ka tawo ang nagtigom gawas sa examination venue aron mosuporta ug mo-cheer sa mga nagkuha sa Bar Exams.
Gibantayan sa mga security personnel ang lihok sa mga tawo, trapiko ug palibot sa lugar. Andam usab sila sa posibleng emergency ug medical needs, ilabi na tungod sa ulan.
Sa kinatibuk-an, 203 ka personnel gikan sa PRO7, Bureau of Fire Protection, Cebu City Transportation Office, Barangay Public Safety Officers, Philippine Coast Guard, CDRRMO ug USJ-R medical team ang gi-deploy alang sa seguridad, traffic management, crowd control ug emergency response.
Gidayeg ni PRO7 Regional Director PBGen Arnold E. Abad ang mga personnel ug partner agencies tungod sa ilang kooperasyon ug pagkaandam.
Matud ni Abad, ang malinawon nga pagtapos sa Bar Exams nagpakita sa maayong pagpangandam ug koordinasyon sa mga ahensya aron mapabiling luwas ug hapsay ang dagkong kalihokan sa Cebu.
I via Renante Socia Lada