Dakong kalampusan ang nakab-ot sa Police Regional Office 7 (PRO7) sa ilang kampanya batok ilegal nga drogas human masakmit ang ₱494.8 milyon nga kantidad sa ilegal nga drogas ug pagdakop sa 3,948 ka mga suspetsado gikan Enero 1 hangtod Mayo 31, 2025.
Sa maong lima ka buwan nga operasyon, nasakmit ang 72.32 kilos sa shabu nga gibana-banang nagkantidad og ₱491.8 milyon ang kantidad ug mga marijuana nga nagkantidad og ₱3 milyon.
Sa tibuok rehiyon, 3,420 ka drug operations ang gihimo nga misangpot sa pagdakop sa 215 ka high-value targets, 2,180 ka street-level drug suspects, ug 1,553 ka bag-ong nailhang drug personalities.
Si PBGEN Redrico A. Maranan, Regional Director sa PRO7, mipasalamat sa kalampusan sa mga kapulisan ug sa kooperasyon sa komunidad.
“This achievement is the result of intensified law enforcement, community collaboration, and unyielding resolve to protect the people of Central Visayas from the destructive grip of illegal drugs. We will continue our efforts until our communities are truly safe, peaceful, and drug-free,” matod pa ni PBGen. Maranan.
Gidugang niya nga magpadayon ang PRO7 sa ilang misyon sa pagpangdakop ug pagpanalipod sa katawhan, ug iyang gi-awhag ang publiko nga magpabiling mabinantayon ug mutabang sa pag-report sa mga kalihokan may kalabot sa ilegal nga drogas.
Source: PRO7
I via Renante Socia Lada