Ang Regional Director sa PRO7, si PBGen Redrico Maranan, mipahibalo sa mga bag-ong kalihokan sa kapulisan sa Central Visayas uban sa ilang kalampusan.
Gikan sa Enero 27 hangtod 29, 2025, ang mga awtoridad naglusad og sunod-sunod nga koordinadong operasyon nga misangpot sa pagkumpiska sa ilegal nga drogas nga nagkantidad og PHP 13.4 milyon ug sa pagkasikop sa 595 ka mga suspetsado.
Sa maong 72 ka oras nga operasyon, ang kapulisan nakarekober og 1,969.78 gramos nga shabu ug 25 gramos nga marijuana, nga nagpakita sa ilang lig-on nga determinasyon sa pagbatok sa ilegal nga kalihokan sa drogas.
Ang hiniusang paningkamot batok sa ilegal nga sugal nakab-ot usab og positibong resulta diin nakumpiska ang kantidad nga PHP 22,374 ug nadakpan ang 225 ka indibidwal sa 132 ka operasyon.
Gawas sa pag-atubang sa mga isyu sa drogas ug sugal, ang kapulisan nakahimo usab og dakong progreso sa pagbatok sa problema sa mga dili rehistradong armas. Sa kinatibuk-an niabot sa 101 ka armas ug duha ka eksplosibo ang nakumpiska, nga misangpot sa pagdakop sa 27 ka tawo.
Dugang pa, ang kampanya batok sa mga wanted nga personahe nakaresulta sa pagdakop sa 133 ka indibidwal nga adunay outstanding warrants, lakip na ang 19 nga giila nga most wanted.
Si PBGen Maranan mipahayag nga ang mga proaktibong inisyatiba nga gihimo atol sa maong panahon nagpakita sa dedikasyon sa kapulisan sa pagpanalipod sa kaluwasan ug seguridad sa Rehiyon 7.
“These statistics capture the essence of our ‘Makabagong Pulis’ peace and order operational formula, which reflects a modern and progressive policing approach. Our goal is to transform PRO7 into a regional office that the Central Visayas community can trust, respect, and depend upon—where every citizen feels protected and valued,” segon ni PBGen Maranan.
Ang tanang nadakpan anaa karon sa kustodiya sa kapulisan, ug ang angay nga mga kaso andam na alang sa pagsumite sa korte.
Source: PRO-7, PIO
I via Renante Socia Lada
RPN DYKC CEBU