Dako nga kadaugan batok sa kriminalidad ang nakab-ot sa Police Regional Office 7 (PRO7) atol sa gilusad nga Region-Wide Simultaneous Anti-Criminality and Law Enforcement Operations (SACLEO) gikan Agosto 6 hangtod 8, 2025, uban ang suporta sa lain-laing ahensya sa kapulisan ug seguridad.
Sa tulo ra ka adlaw nga operasyon, nakasakmit ang PRO7 ug shabu nga mokabat sa 1,131.96 gramos nga nagkantidad ug ₱7.7 milyon gikan sa 155 anti-drug operations, nga miresulta sa pagkasikop sa 173 ka suspek sa drogas.
Nadakpan usab ang 17 ka Most Wanted Persons ug 91 pang laing wanted persons sa rehiyon. Sa kampanya batok iligal nga armas, nakumpiskar ug gisurender ang 46 ka pusil ug 2 ka eksplosibo, ug 15 ka tawo ang nasikop. Sa operasyon batok iligal nga sugal, 60 ka indibidwal ang nadakpan ug ₱10,417 nga pusta ang nakumpiskar.
Matod ni PBGEN Redrico A. Maranan, Regional Director sa PRO7, ang operasyon nagtuman sa direktiba sa Chief PNP nga magpadayon sa agresibo ug walay hunong nga kampanya batok tanang klase sa krimen.
Source: PRO7
I via Renante Socia Lada