Cebu City – Gitinguha sa bag-ong naka lingkod nga kongresista nga bahinon ang First Congressional District sa Sugbo ngadto sa duha ka distrito.
Gikonpirma ni Kongresista Rhea Gullas sa 1st District sa Sugbo, nga lakip sa mga bills nga iyang gi file sa House of Representatives mao ang plano paghimo ug ika walo nga distrito.
Ang first district sa lalawigan sa Sugbo kasamtangan nga gilangkoban sa tulo ka mga syudad ug tulo ka mga munisipalidad.
Kini mao ang mga syudad sa Talisay, Naga ug Carcar ug mga lungsod sa Minglanilla, San Fernando ug Sibonga.
Sa higayon nga mapasar na ang maong balaudnon, ang mahibilin nga sakop sa unang distrito sa lalawigan mao ang Dakbayan sa Talisay u gang lungsod sa Minglanilla.
Matod ni Gullas nga ang mga syudad sa Naga ug Carcar ug ang mga lungsod sa San Fernando ug Sibonga, sa pikas bahin, maoy maglangkob sa ika-walo nga distrito.
Gilatad ni Gullas ang mga rason kung nganong miduso kini sa katukuran sa ika-walo nga distrito sa Sugbo.
Kini naglakip sa nagka daghan nga populasyon, ug ang panginahanglan nga dunay maayong representation ngadto sa national government.
Lakip sa mga rason ang improvement sa delivery sa essential services ug ang dako nga pahat sa national budget.
“I believe nga kung tungaon – dako ra kaayo ang 1st District. The 1st District, more or less, has a population of almost a million. So medyo dako-dako gyud siya. If you look at other districts, they only have 250 (thousand) to 300 (thousand),” pasabot ni Gullas.
“So, I believe if tungaon na ang distrito with a near representative, mas maatiman and maalagad gyud ang katawhan,” dugang sa kongresista.
Ang bag-ong magbabalaud nangunsulta sa mga mayor sa unang distrito sa lalawigan sa Sugbo labot sa nahisgutang proposal.
“Padayun ang consultative type of leadership before everything else. Dili lang sa among grupo, apil sad ang mayors amo sad gikonsulta,” pahibaw ni Gullas.
Gikonsidera ang unang distrito sa Sugbo nga maoy labing dako sa pito ka mga congressional district.
Base sa 2020 census, ang unom ka mga local government units (LGUs) nga naglangkob niini dunay kinatibuk-ang populasyon nga 809,335.
Kini dul-an sa 24 porsento sa kinatibuk-ang populasyon sa lalawigan sa Sugbo.
Gawas sa katukuran sa ika-walo nga distrito,si Gullas, nagtinguha sab nga ma facilitate ang pagka himong syudad sa Minglanilla. (Jhon Tadlip)
(News & photo courtesy of 1st District Rep Rhea Gullas)