Gidawat ni Lola Visitacion Jabonero, taga-Brgy. Punta Princesa, Cebu City niadtong Oktubre 16, 2024, ang P85,000 nga tseke nga personal nga gitunol ni Mayor Raymond Alvin Garcia isip pahalipay kay nakaabot siya sa edad nga 100.
Nag-100 anyos si lola Visitaciaon niadtong Hulyo 2, 2024.
“Si Raymond Garcia ko, mayor sa siyudad sa Sugbo. Nianhi ko diri kay maghatud ko tseke kay naabot na man ka’g 100. So, ang Cebu City Government mo-award nimo,” pulong sa mayor.
Gipasabot siiya ni Mayor Garcia nga P85,000 ang tseke imbis P100,000 kay una na mang gihatag sa dakbayan ang P5 sa pag-edad niya og P80 anyos ug ang P10,000 sa pag-edad niya og P90 anyos, nga subay sa Republic Act 10868, o ang “The Centenarian Act of 2016”.
“Kining kwartaha maghatod ko’g pamisa. Pirmiro, tanan mga kalag sa purgatory. magpasalamat ako,” tubag ni lola Visitacion dihang gipangutana unsay gamitan niya sa kwarta.
“Di nako buwagan akong pag-ampo sa mahal nga birhen Maria,” dugang niyang sulti.
Kabahin sa iyang sekreto sa taas nga kinabuhi? Wala siyay pili sa pagkaon, apan kanunay siyang nag-ampo, nagrosaryo ug nag-orasyon kada adlaw.
“Ang nakapataas nako (og edad mao ang) sige’g ampo, sige’g rosary. Di ko magpawa sa rosary,” sulti ni lola Visitacion ngadto kang Mayor Garcia.
Sa napulo nila ka managsuon, si lola Visitacion nalang ang nahabilin. Na biyuda siya sa edad nga 53 anyos ug nag-inusarang nag-atiman sa 12 niya ka buok mga anak.
Aron ipakita nga lig-on pa siya bisan nag-edad na og 100 anyos, gisayawan niya ug gikantahan ang mayor.
Kuyog ni Mayor Garcia sa pagtunol sa tseke ni lola Visitacion si Chito Aragon, executive director sa Office of the Senior Citizens Affairs, ug Kapitan Eleno “Jhun” Andales sa Punta Princesa. (Renante Socia Lada)
(Source: Cebu City PIO)