Bisan holiday tungod sa pagsaulog sa ika-457 nga Provincial Charter Day sa Sugbo, nagpadayon gihapon sa ilang trabaho ang mga personnel sa Cebu City Department of General Services (DGS) aron mapugngan ang pagbaha sa siyudad.
Sayo sa Huwebes sa buntag, nagpahigayon sila og desilting ug pagpanglimpyo sa M.J. Cuenco-Palma Bridge ug sa agianan sa tubig sa Tisa-Labangon. Gikuha nila ang lapok, basura, ug uban pang sagabal nga makapugong sa hapsay nga pag-agas sa tubig.
Sumala sa siyudad, ang maong operasyon makatabang aron mas paspas ang pag-agas sa tubig-ulan ug maminusan ang posibilidad sa pagbaha ilabi na kung kusog ang ulan. Padayon usab ang regular nga pagmentinar sa mga kanal ug sapa isip kabahin sa flood mitigation program sa lokal nga gobyerno.
Giawhag usab sa Cebu City Government ang tanang Sugboanon nga magtinabangay pinaagi sa husto nga paglabay sa basura ug dili pagsalikway niini sa mga suba, sapa, ug kanal. Matud pa sa siyudad, ang kooperasyon sa katawhan importante aron magpabiling limpyo ang mga agianan sa tubig ug malikayan ang pagbaha.
I via Renante Socia Lada