Nadakpan sa mga otoridad ang usa ka menor de edad nga gi-lista isip wanted person atol sa operasyon sa pagpatuman sa warrant of arrest niadtong nakalabay nga gabii sa usa ka coastal barangay sa Santa Fe.
Sumala sa report sa Santa Fe Municipal Police Station, mga alas 8:30 sa gabii dihang gipatuman sa Tracker Team ang warrant of arrest batok sa 16-anyos nga lalaki tungod sa kasong robbery in an uninhabited place with force upon things.
Ang suspek, nga giila isip Child in Conflict with the Law (CICL), gipahibalo sa rason sa iyang pagdakop ug sa iyang mga katungod ubos sa balaod atol sa operasyon. Hapsay ug walay nahitabo nga insidente ang pagpatuman sa operasyon, subay sa standard police procedures.
Human sa iyang pagdakop, gidala ang menor sa usa ka ospital alang sa routine physical examination, ug dayon gitugyan sa Municipal Social Welfare and Development Office aron mahatagan og hustong pag-atiman ug proseso sumala sa juvenile justice protocols.
Gikompirmar sa mga otoridad nga ang piyansa alang sa temporaryong kagawasan sa akusado gitakda sa ₱18,000. Padayon ang koordinasyon sa mga ahensya alang sa sunod nga legal nga proseso.
Samtang, gidayeg ni PCOL Abubakar Udang Mangelen Jr., Provincial Director sa Cebu Police Provincial Office, ang operating team tungod sa malampusong operasyon samtang gisiguro usab ang pagpanalipod sa katungod sa menor.
Matud niya, nagpakita kini sa lig-on nga commitment sa kapulisan sa pagpatuman sa balaod samtang gibantayan ang kaayohan sa mga kabatan-onang nakasala sa balaod, uban sa paghatag og tukmang interbensyon aron matultolan sila padulong sa rehabilitasyon.
Padayon usab ang kampanya sa CPPO batok sa mga wanted persons samtang nagtinabangay sa mga social welfare agencies aron masiguro nga ang mga kaso nga naglambigit og menor de edad matagad pag-ayo nga subay sa balaod ug child protection policies.
Source: CPPO
I via Renante Socia Lada