Nagpadayon ang hugot nga anti-criminality ug anti-illegal drugs operations sa Cebu City Police Office (CCPO), nga miresulta sa daghang pagdakop ug pagkarekober sa gidudahang ilegal nga drogas sa lain-laing lugar sa Cebu City sukad kagahapon Mayo 4 hangtod sayong buntag sa Mayo 5, 2026.
Ubos sa liderato ni PCOL George V. Ylanan, gipahigayon ang Simultaneous Anti-Criminality Law Enforcement Operations (SACLEO) nga nagdala og sunod-sunod nga operasyon sa kapulisan.
Sa Sitio Looban, Barangay Tejero, alas 10:50 sa gabii niadtong Mayo 4, nadakpan sa Police Station 3 ubos sa pangulo ni Michael T. Sevilla ang usa ka suspek nga nasakpan nga adunay gidudahang shabu nga may gibug-aton nga 0.09 gram ug balor nga ₱612.
Sa laing operasyon alas 12:15 sa kadlawon sa Mayo 5, nadakpan usab ang usa ka indibidwal sa Sitio Maxipino, Barangay Bulacao sa aksyon sa Police Station 7. Narekober gikan kaniya ang gidudahang shabu nga may gibug-aton nga 0.12 gram ug balor nga ₱816.
Samtang sa Barangay Suba, alas 11:50 sa gabii niadtong Mayo 4, usa ka buy-bust operation sa Police Station 6 ang nagresulta sa pagdakop sa usa ka suspek ug pagkarekober sa halos 4.95 gramos nga gidudahang shabu nga nagkantidad og ₱33,660.
Sa laing operasyon sa maong barangay alas 8:45 sa gabii, usa pa ka indibidwal ang nadakpan nga adunay 0.08 gramos nga gidudahang shabu nga nagkantidad og ₱544.
Sa kinatibuk-an, mokabat sa 5.24 gramos nga gidudahang shabu ang narekober sa tanang operasyon, nga adunay total nga balor nga ₱35,632.
Ang tanang nadakpan karon anaa sa kustodiya sa kapulisan samtang giandam ang mga kaso batok kanila tungod sa paglapas sa Republic Act 9165.
Sumala sa CCPO, nagpadayon ang ilang lig-on nga kampanya batok sa ilegal nga drogas ug kriminalidad aron masiguro ang kaluwasan ug kahapsay sa komunidad pinaagi sa hiniusa ug gipahugot nga operasyon.
Source: CCPO
I via Renante Socia Lada