Patay nga nakit-an ang usa ka 26-anyos nga baker sa sulod sa iyang giabangan nga lawak sa Purok 6A, Barangay Cubacub, Mandaue City niadtong buntag sa Mayo 9, 2025.
Ang biktima giila nga si Arnel Almonicar Batiancila, ulitawo, lumulupyo sa Kinatarcan, Santa Fe, Cebu ug temporaryong nagpuyo sa Cubacub, Mandaue City. Kapin usa ka tuig na siyang nagtrabaho isip baker sa Joshua Bakery nga nahimutang usab sa Brgy. Cubacub.
Sumala sa kasayuran, alas 8:00 sa buntag unta siya motrabaho sa panaderiya apan wala kini mitunga. Ang usa niyang kauban sa trabaho misuroy sa ilang boarding house aron tan-awon siya, apan didto na kini nakit-an nga walay kinabuhi sulod sa lawak, may samad sa tuo nga mata ug may dugo sa maong dapit.
Daling nangayo ug panabang ang iyang kauban sa mga silingan ug kapulisan. Alas 9:50 sa buntag pormal nga nadawat ang taho sa mga otoridad kabahin sa insidente.
Sa inisyal nga imbestigasyon, walay klaro nga indikasyon sa pagkakaron sa hinungdan sa kamatayon. Gihisgutan usab nga kaliwat sa biktima ang adunay kasaysayan sa high blood sumala sa ginikanan, apan matod sa iyang mga kauban sa trabaho, wala kini magpakita og sakit o kabati og dili maayo sa panglawas.
Ang SOCO team gimandoan na aron mo-proseso sa crime scene samtang ang imbestigasyon sa kapulisan nagpadayon.
I via Renante Socia Lada