Nagsugod na og strategic planning sessions ang Cebu Provincial Government uban sa nagkalain-laing departamento sa Kapitolyo aron ihan-ay ang ilang mga programa, proyekto, ug kalihokan sa direksyon ug prayoridad ni Gobernadora Pamela Baricuatro alang niining tuiga.
Sumala sa Kapitolyo, ang maong pagplano nakabase sa estilo sa pagpanguna sa gobernador nga nagatutok sa klaro nga proseso, tin-aw nga tumong, ug mas masukod nga resulta sa serbisyo publiko.
Tumong niini nga masiguro nga ang mga buhat sa gobyerno angay sa tinuod nga panginahanglan sa katawhan ug adunay klarong kaayohan.
Sa pagkakaron, nahuman na ang strategic planning sa Provincial Disaster Risk Reduction and Management Office (PDRRMO), Provincial Veterinary Office (PVO), Provincial Social Welfare and Development Office (PSWDO), ug Provincial Legal Office (PLO). Gitutokan niini ang pagtakda og klarong prayoridad, pag-ayo sa mga pamaagi sa trabaho, ug pag-align sa mga programa sa kinatibuk-ang tumong sa administrasyon.
Gilauman nga ang uban pang mga opisina sa Kapitolyo moagi usab og susamang strategic planning sa mosunod nga mga semana isip kabahin sa padayon nga paningkamot sa probinsyal nga gobyerno sa Cebu nga makahimo og usa ka nagkahiusang plano nga pokus sa resulta alang sa tibuok tuig.
Source: Cebu Province PIO
I via Renante Socia Lada