Usa ka kapin tuig nga bata nga babaye ang namatay human nalabay ug nalatayan sa usa ka dump truck sa Sityo Tangub, Barangay Lagtang, Talisay City kagahapon sa hapon.
Sumala sa pasiuna nga imbestigasyon sa Talisay City Police Station ug sa CT-TODA, gikugos sa inahan ang bata samtang ang amahan maoy nagmaniho sa motorsiklo. Gikan sila sa Barangay Tabunok ug pauli na unta sa Kampo 4 dihang nahitabo ang aksidente.
Base sa pamahayag sa pipila ka saksi, nagdulhog ang motorsiklo ug wala na nakontrol sa amahan hangtod nga nalamba kini paingon sa daplin sa dalan diin adunay dump truck.
Ang driver sa dump truck nag-ingon nga hinay ra silang nagpadulong ug naa ra sila daplin sa dalan. Nadungog niya ang mga singgit ug kalit lang mitarog ang iyang sakyanan. Human niini, nadungog usab niya nga adunay mibuto ilawom sa truck.
Wala pa mohatag og pamahayag ang amahan tungod sa grabeng kaguol nga iyang gibati.
Ang driver sa dump truck anaa na karon sa kustodiya sa kapulisan samtang nagpadayon ang imbestigasyon aron masuta ang tinuod nga hinungdan sa insidente.
Source: CT-TODA
I via Renante Socia Lada