Subra sa 7,000 ka minimum wage earners sa lalawigan sa Negros Oriental ang nakapahimulos na sa programa sa goberno nga ₱20 kada kilo nga bugas, sumala sa Department of Labor and Employment (DOLE).
Nagsugod ang “Benteng Bigas Meron Na” program sa lalawigan niadtong Hunyo uban sa pipila ka negosyo nga miapil sa inisyatiba, matod ni Nole Torres, senior labor officer sa DOLE-Negros Island Region ug focal person sa maong programa.
Matod ni Torres, kini mao ang pagtuman sa saad sa Presidente nga ₱20/kilo nga bugas, apan para lang kini sa minimum wage earners, samtang ang Department of Agriculture maoy mangunay para sa sektor sa mga kabus.
Kaganihang Sabado, gipangulohan ni Labor Secretary Bienvenido Laguesma ang pag-apod-apod sa bugas sa 50 ka benepisyaryo gikan sa upat ka negosyo sa siyudad sa Dumaguete atol sa seremonya sa DOLE-NIR office sa Barangay Bajumpandan.
Ang mga nakadawat gikan sa Prime Retail Corporation, Dynamic Development Corporation, Luxe Prime Retail Corporation ug Superstore Retail Corporation. Sa miaging adlaw, mitabang usab si Laguesma sa pag-apod sa bugas sa 50 ka sugar workers sa Tanjay City, nga nagpakita nga nagpalapad na ang programa sa lain-laing sektor.
Gipasabot ni Torres nga dili lang para sa mga kabus ang maong programa kay ang mga trabahante sa pribadong kompanya mahimong makapahimulos usab niini. Ang pamaagi mao nga ang employer mopalit sa bugas sa subsidized price ug ipanghatag kini sa mga trabahante nga mobayad pinaagi sa salary deduction.
Kinahanglan nga isumite sa miapil nga kompanya ang lista sa ilang empleyado sa DOLE para sa verification, ug pagkahuman mag-coordinate kini sa Food Terminal, Inc. ug National Food Authority alang sa pagproseso.
Gidani ni Torres ang mas daghang pribadong kompanya nga moapil sa programa aron matabangan ang ilang mga trabahante makakuha og barato nga bugas ug maminusan ang gasto sa panimalay. Matod pa niya, kini nga programa dili lang nakatabang sa panginabuhi sa trabahante, kundili nagdasig usab sa ilang moral ug nagsiguro sa pagkaon sa ilang pamilya.
Source: PNA
I via Renante Socia Lada