Gipalig-on sa Cebu City Government ang ilang mga lakang sa pagpangandam batok sa hulga sa El Niño, ilabi na sa pagdumala sa suplay sa tubig ug pagtabang sa mga sektor nga maapektuhan.
Sa usa ka press conference, gipasiugda ni Mayor Nestor Archival ang panginahanglanon nga madugangan ang budget aron maatubang ang epekto sa dugay nga hulaw.
Nakig-coordinate na ang dakbayan sa Metropolitan Cebu Water District ug uban pang ahensya aron mahibaloan ang mga lugar nga posibleng maapektuhan sa kakulang sa tubig, labi na sa north ug south districts.
Gipahimangnoan usab ang City Agriculture Department nga susihon ang kahimtang sa mga mag-uuma ug sukdon ang epekto sa El Niño sa produksyon sa agrikultura. Ang ilang report gamiton isip basihan sa gobyerno sa dakbayan sa paghatag og tabang ug pagplano sa mga angay buhaton.
Sumala sa mga opisyal, gawas sa mga dali nga solusyon, nagtan-aw usab ang dakbayan og dugayng mga pamaagi aron masiguro ang padayon nga suplay sa tubig. Apil niini ang sustainable water systems, pagpaayo sa water storage, ug pagtukod og mga proyekto sa imprastraktura nga ilakip sa umaabot nga budget.
Gipasiugda ni Mayor Archival nga ang pag-atubang sa El Niño nagkinahanglan og dali nga aksyon ug maayong plano alang sa umaabot aron mapalig-on ang ka-andam sa dakbayan batok sa mga hagit sa klima.
Source: Cebu City PIO
I via Renante Socia Lada