Usa ka 19-anyos nga babaye ang namatay human dunggaba sa iyang kanhi nga kapuyo nga nasuko kay gibuwagan siya ug gibalibaran nga magbalik pa sila. Nahitabo ang insidente sa Barangay Tisa, Cebu City kagabii, Hulyo 15, 2025.
Ang biktima giila nga si Lorie Faith Pitogo, lumolupyo sa Sitio Sunflower, Barangay Tisa. Ang suspetsado mao si Mike Lasanas, 22-anyos, nga nakasibat human sa hitabo. Silang duha dunay duha ka anak.
Sumala sa pulis, kanunay kuno dapatan sa suspek ang biktima ug tungod niini, nibuwag na siya ug midangop pa sa Women and Children Protection Desk (WCPD). Gisugyot nga pasakaan og reklamo ang suspek, pero wala na siya mibalik.
Kagabii, samtang nibisita sa balay sa iyang apohan ang biktima nga duol sa puy-anan sa suspek, nakigkita ang lalaki ug misuway og hangyo nga magbalik sila, pero gibalibaran. Diha-diha, nasuko ang suspek ug misugod og panunggab.
Naigo sa liog ug bukton ang biktima ug dali kining gidala sa Cebu City Medical Center (CCMC), apan gideklarar nga dead-on-arrival.
Gipahibaw sa pulisya nga adunay social media post ang suspek sa milabay nga buwan nga nagpakita og kasina ug kasuko, usa ka posible nga timailhan sa motibo.
Padayon karon ang pagpangita sa suspek sa mga otoridad. Nangayo og tabang ang pamilya sa biktima aron madakpan si Lasanas ug matubag ang iyang gibuhat.
I via Renante Socia Lada