Dugang ganti nga muabot ngadto sa P200,000 ang gitanyag ni Acting Mayor Raymond Alvin Garcia alang sa ni bisan kinsa nga makahatag sa pangalan sa uban pang mga tulisan ug makatudlo sa ilang nahimutangan.
Mahinomduman nga niadtong Huwebes sa niaging semana nibutyag si Acting Mayor Garcia nga motunol siya gikan sa iyang kaugalingong bulsa og P100,000 isip ganti alang sa makatudlo kinsa ang mga tulisan nga nibiktima og duha ka mga palitanan og alahas sa maong adlaw.
“From 100k reward naa nay napuno. Na-double na. P200k for anyone who can give us any information for the arrest and identification of these individuals …. Off course, naa gyud nay additional identification and then leading to the arrest. Naa nay P200,000,” matod ni Acting Mayor Garcia.
Samtang sa kalambuan sa kapulisan sa ilang gihimong pag imbestigar nailhan na usab ang tulo sa unom ngadto sa walo ka mga tawo nga nitulis sa duha ka palitanan og alahas sa dalan Calderon, Brgy. Ermita, dakbayan sa Sugbo Huwebes sa niaging semana.
Kini maoy gitug-an ni Acting Mayor Garcia atol sa iyang senemana nga press conference karong adlawa, Agosto 12, 2024.
Duna na say lima ka mga saksi nga nakahatag na og impormasyon sa kapulisan kalabot sa mga tulisan, nga gituhoang nidala sa dili mominos P14 milyones nga balor sa mga alahas.
Giklaro hinuon ni Acting Mayor Garcia nga dili lang una niya isulti ang pangan sa tulo ka mga tulisan nga nailhan na sa kapulisan kay nagpadayon pa hangyod karon ang pagpangita kanila.
“I cannot divulge anything else like their names…. Sa pagkakaron, atong gipangusgan gyod ang case build up aning atong mga suspect so that once we filed the necessary cases in court dili maparehas sa last time nga na-dismiss lang,” ingon niya.
“I want to see this strong, nga naa gyuy conviction…mao nang naay case build up. Meaning, sa case build up, nanguha ta’g mga ebidensya against these individuals who are suspects and who we think maoy perpetrators sa mao nga crime,” dugang niya.
Gitug-an ni Acting Mayor Garcia nga kanunay nga nakig-alayon kaniya si Pol. Col. Antonieto Cañete, acting Cebu City Police Office director, alang sa kalamboan sa imbestigasyon sa maong pagpanulis. (Renante Socia Lada)
(Source: Cebu City PIO)