Nikalas og usa ka kinabuhi ug niangol og usa ka tawo ang nahitabong disgrasya sa motorsiklo ug dump truck.
Didto kini nahitabo sa Nasudnong dalan sa Barangay North Poblacion, lungsod sa San Fernando, probinsya sa Sugbo, pasado alas 11:00 sa niaging gabii, Abril 22, 2024.
Ang biktima nga nakalas giila sa San Fernando Police Station nga mao si Mathew Anthony Sarmiento Padin, 25 anyos ang panuigon, taga Barangay Bolinawan, dakbayan sa Carcar.
Naila usab ang naangol nga mao si Stephanie Pontejos Castaño, 28 anyos ang panuigon, taga Barangay Basak Pardo siyudad sa Sugbo.
Giila usab ang suspetsado nga drayber sa dump truck nga mao si Rimboy Alia Restauro, 28 anyos ang pangidaron, residenti sa Barangay Bugho, lungsod sa San Fernando.
Sa inbestigasyon sa San Fernando Police Station nasayran nga ang duha ka mga sakyanan nagbiyahi sa susamang direction diin sa pag abot sa maong lugar na dasmagan ang mga sakay sa motorsiklo.
Nangapasok sila sa maong dump truck na maoy hinungdan sa grabing kadaot sa ilang lawas.
Nakalas si Padin didto sa tambalanan ug padayong giatiman ang angkas niini nga kaipon usab sa drayber.
Sa pagkakaron padayong gitanggong sa prisuhan ang suspetsado samtang giandam ang tukmang kaso niini. (Renante Socia Lada)
