Sunod-sunod karon ang gihimong orientation sa Housing and Urban Development Office (HUDO), sa dakbayan sa Mandaue para sa umaabot na pagpuyo sa laing benepisyaryo sa “Pasilong Para sa Paradise.”
Ang “Pasilong Para sa Paradise” o temporary shelter na nahimutang likod sa CICC, Barangay Guizo, siyudad sa Mandaue maoy temporaryong kapuy-an sa mga nabiktima sa sunog sa Sitio Paradise, Brgy. Looc, dakbayan sa Mandaue.
Aduna kini 1,200 ka mga units na itukod sa kagamhanan sa dakbayan sa Mandaue ubos sa liderato ni Mandaue City Mayor Jonas Cortes, diin ang dul-an sa 700 ka mga pamilya nagagikan sa Sitio Paradise, Brgy. Looc na naigo sa dakong sunog niadtong Nobyembre 22, 2022.
Lakip usab na mupuyo sa maong temporary shelter ang mga nabiktima sa sunog nga nagagikan sa Brgy.Guizo ug Brgy.Tipolo ning dakbayan sa Mandaue.
Si Fatima Lapina sa HUDO nagpasabot sa mga benepisyaryo kabahin sa mga house rules and regulations ug uban pa, isip pagpangandam sa pagpuyo nila karong adlaw na Miyerkulis Hunyo 7, 2023.
Adunay 49 ka mga pamilya ang dugang mupuyo sa “Pasilong Para sa Paradise” Sila ang ikaduha na batch nga nabunutan.
Way hunong usab sa paningkamot si Reyman Galve, Presidenti sa Paradise Urban Poor Home Owner Association Inc. (PUPHOAI) na mahiluna ang iyang mga miyembro dili lang sa temporary shelter apan sa pernamenti niini na kapuy-an na mao ang Condominium Project ubos sa Housing Program sa goberno.
Si Galve nanawagan sa LGU Mandaue na mapadali ang pag tukod sa Temporary Shelter gumikan kay daghan pa usab ang hangtod karon nga atua sa evacuation center ug nag-abang.
Gikalipay pag ayo sa mga na biktima sa sunog ang way pu-as na tabang sa goberno ug susama usab ang ilang hangyo ni Mayor Jonas Cortes na mapaspasan unta ang pagtukod sa “Pasilong Para sa Paradise.” (Renante Lada, photo courtesy by Reyman Galve)