Dakong kalampusan sa kapulisan sa Cebu Police Provincial Office (CPPO) human madakpi ang usa ka Top 1 Most Wanted Person sa lebel sa lungsod, Top 4 sa probinsya, ug Top 8 sa rehiyon sa gihimong operasyon sa Barangay Poblacion, Ronda, Cebu niadtong nakalabay nga mga adlaw.
Ang maong operasyon gihimo sa Ronda Municipal Police Station (MPS) uban sa tabang sa Women and Children Protection Center–Visayas Field Unit (WCPC-VFU). Apil usab sa operasyon ang Intelligence Unit, Drug Enforcement Unit, ug warrant server sa Ronda MPS.
Sumala sa kapulisan, ang pagdakop resulta sa ilang intelligence-driven operation o base sa nakalap nga impormasyon. Gipatuman ang mga warrant of arrest batok sa suspetsado tungod sa mga kaso nga may kalabutan sa pagpanalipod sa mga bata.
Ang suspetsado nag-atubang og duha ka kaso sa Lascivious Conduct ubos sa Section 5(b) sa Republic Act No. 7610, nga gi-amendahan sa RA 11648.
Matag kaso adunay girekomendar nga piyansa nga ₱180,000. Dugang pa niini, gipasanginlan usab siya sa Anti-Child Pornography Act of 2009, Cybercrime Prevention Act of 2012, ug sa balaod batok sa Online Sexual Abuse ug Exploitation of Children (OSAEC), nga walay girekomendar nga piyansa.
Ang warrant gi-isyu niadtong Mayo 29, 2026 sa Regional Trial Court (RTC), Seventh Judicial Region sa Barili, Cebu, ug opisyal nga nakarehistro sa PNP E-Warrant System.
Gidayeg ni CPPO Provincial Director PCOL Abubakar Udang Mangelen Jr. ang operasyon ug mipasabot nga padayon ang ilang kampanya batok sa mga naglapas sa balaod, ilabi na kadtong nag-abuso sa mga bata.
Mipadayag usab ang CPPO nga magpadayon sila sa ilang kampanya batok sa tanang matang sa krimen, labi na kadtong makadaot sa kaluwasan ug dignidad sa kabataan.
📸 CPPO
I via Renante Socia Lada