Naglusad ang Cebu Provincial Government niadtong Huwebes, Enero 22, og daghang programa sa agrikultura ug panginabuhian aron palig-onon ang seguridad sa pagkaon, makunhuran ang kakabus, ug paspasan nga ma-recover ang sektor sa agrikultura sa tibuok probinsya, subay sa komitment ni Gov. Pamela Baricuatro sa inclusive growth ug resilient nga komunidad.
Gipahigayon sa Danao City para sa northern Cebu ang paglusad sa FAITH (Food Always in the Home), Agrilink Cebu, ug Adopt-a-Farm Program, nga naghatag og dali nga suporta ug long-term nga sistema alang sa mga mag-uuma, mangingisda, ug mga kabus nga pamilya aron mabuhi ug mapadayon ang ilang kinabuhi. Ang mga benepisyaryo gikan sa 4th ug 5th districts nakadawat og tanom sa utanon, manok bisaya, isda, feeds, ug uban pang gamit para sa home food production ug gagmay nga negosyo.
Ang FAITH Program gilaraw aron masiguro nga ang matag pamilya adunay igong pagkaon samtang naghatag og oportunidad sa dugang kita pinaagi sa backyard ug community-based food production.
Sa laing bahin, ang Agrilink Cebu usa ka online platform nga nagdugtong diretso sa mga mag-uuma, mananagat, ug lokal producers ngadto sa mga buyers, aron malikayan ang sobra nga pagsalig sa middlemen ug mapadali ang negosasyon.
Gipasiugda usab ang market access ug logistics pinaagi sa deployment sa duha ka service vans nga mopadala sa produkto gikan sa farm ug fishing communities padulong sa merkado. Kini makatabang sa pagpakunhod sa post-harvest losses, pagpas-pas sa delivery, ug pagsiguro nga presko ang produkto nga moabot sa konsumidor.
Ang Adopt-a-Farm Program, nga gi-institutionalize pinaagi sa executive order, nag-awhag sa mga partner sa public ug private sector, civil society, eskwelahan, ug development partners nga direktang motabang sa mga naapektuhan nga uma, maghatag og seeds, fertilizers, equipment, irrigation, farm road repairs, teknolohiya, financing, insurance, ug market linkages.
Ang FAITH, Agrilink, ug Adopt-a-Farm nagpakita sa integrated nga pamaagi sa probinsya sa food security, poverty alleviation, ug sustainable development sa farming ug fishing communities sa Cebu.
Source: Cebu Province PIO
I via Renante Socia Lada