Pormal nga gilusad sa Cebu City Police Office (CCPO) ubos sa pagpanguna ni PCOL George V. Ylanan, Officer-in-Charge, ang Bike Patrol Program niadtong buntag sa Nobyembre 24, 2025, sa Tourist Police Office dinhi sa siyudad.
Ang inisyatiba gimandoan ni PCOL Ylanan ug gipatuman sa mga sakop sa Tourist Police Unit uban nila PLTCOL Miguel B. Andeza, Deputy City Director for Operations, ug PMAJ Mark Don P. Leanza, Chief sa TPU.
Gitumong sa Bike Patrol Program ang pagpataas sa police visibility ug pagpaabot og paspas nga response sa mga lugar nga kanunay daghan og turista lakip na ang mga laaganan, business districts, parks, ug uban pang lugar nga pirmi duolon sa lokal ug langyaw nga bisita.
Tungod sa padayon nga pagsaka sa ihap sa mga bisita sa siyudad, gilauman sa programa nga makatabang kini sa paglig-on sa kahapsay ug kaluwasan ug pagpadako sa presensya sa kapulisan sa mga dapit nga daghan og pedestrian ug lisod sulodlan sa tradisyonal nga patrol vehicles.
Nagsugod ang kalihokan pinaagi sa usa ka pormal nga assembly ug briefing diin gi-orient ang mga personahe bahin sa operational guidelines, ruta sa ronda, response protocols, ug mga safety measures. Gipamatngonan usab ang kamahinungdanon sa professionalism, courtesy, ug situational awareness ilabi na sa pagtabang ug pag-atiman sa mga turista.
Nasundan kini og ceremonial inspection aron masiguro nga ang tanang bisikleta ug gamit lakip na ang protective gear, communication devices, ug first-aid kits, anaa sa hapsay nga kondisyon alang sa deployment. Gipahimangnoan usab ang mga personnel nga dapat kanunay andam ug physically fit alang sa ilang serbisyo.
Ang paglusad sa Bike Patrol Program nagpakita sa dedikasyon sa CCPO sa paghatag og mas luwas, mas responsive, ug mas makita nga presensya sa kapulisan sa mga nag-unang tourist spots sa siyudad.
Pinaagi sa pagpauswag sa mobility ug accessibility, tumong sa programa nga palig-onon ang pagsalig sa publiko ug mapaayo ang serbisyo sa seguridad alang sa mga residente ug bisita sa Cebu City.
Source: CCPO
I via Renante Socia Lada