Subo ug kasakit ang gihambin sa pamilya niining usa ka inahan, human sa ilang kalipay sa pag saulog sa adlawng natawhan niini, dihang gipusil kini sa wala mailhing suspetsado niadtong Sabado, Hulyo 13, 2024, sa Sitio Lower Kawayan, Barangay Sambag 2, Dakbayan sa Sugbo.
Ang biktima giila nga si Jessica, 37-anyos ug lumolopyo sa maong dapit.
Ang biktima nagsaulog sa iyang adlaw’ng natawhan kuyog sa iyang mga barkada, Pag-uli na niini, gisundan sa kini suspek dayong pusil sa makadaghang higayon nga niresulta sa hinanaling kamatayon.
Sa imbistigasyon nga gihimo sa mga kapulisan sa Abellana Police Station, nasayran nga ang biktima, matud pa nga kanhi drug surrenderer niadtong 2018 ug nagpautang usab kini og kwarta sa ilang lugar.
Sa CCTV footage ang suspek magsul-ob ug itom nga hoodie jacket, og dali kining misibat sa dapit human krimen nga iyang nabuhat. Nakuha sa crime scene ang mga kabhang sa bala sa armas nga gigamit sa pagpamusil.
Ang Abellana Police Station padayon pa sa imbistigasyon aron maila ang maong suspek ug mabayran ang salaod nga nabuhat niini. (Ting Joe Pepito & Renante Socia Lada)