Matod sa Cebu City PIO nga gisangon ni Acting Mayor Raymond Alvin Garcia ang labaw sa Cebu City Environment and Natural Resources Office (CCENRO) sa pagpahigayon og pakisusi aron sutaon unsaon nga mapanubag ang tag-iya sa yuta nga nidahili ug nikalas sa kinabuhi sa usa ka 26 anyos nga inahan kagahapon, Septiyembre 1, 2024.
Gimandoan niya si Reymar Hijara atol sa iyang pagbisita sa nahitaboan ug sa haya sa biktima nga si Claire Dosdos karong adlawa, Septiyembre 2.
Mipaabot sa iyang pahasubo ang acting mayor ug nikuot sa iyang kaugalingong kwarta isip hinabang sa pamilya ni Dosdos.
Pulong ni Acting Mayor Garcia, iyang paabuton ang rekomendasyon ni Hijara kung unsay tulobagon sa tag-iya sa yuta.
“Akong giingnan si Reymarr to make a report right away so that makahibawo ta og unsay angayng buhaton. Now, same katong last time, I will repeat it, manubag gyud ang tag-iya ani nga yuta,” sulti niya.
“And based on the investigation that we will make, if there is the finding sala gyud nila and again violation of the laws has been committed, then di ta magpanuko og file og mga cases, either criminal or civil,” dugang niya.
Udto sa Domingo dihang kalit lang natumpag ang riprap nga koral ug nidahili ang yuta og mga bato paingon sa balay ni Dosdos, nga kauban sa iyang sais anyos nga anak lalaki ug unom ka buwan nga masuso.
Naluwas ang masuso kay giingong gisalipdan ni Dosdos sa iyang lawas samtang ang ang kamaguwangan niyang anak nga lalaki nakadagan ug naluwas sa trahedya.
Gawas sa biktima, aduna say magtiayon nga naangol sa maong hitabo.
Ang kapuyo ni Dosdos nga si Adonis Otero, 27, nitug-an nga nilakaw siya pagkabuntag ug sa iyang pagbalik dayong kaudtohon iya nalang naabtan nga natam-okan na ang katunga sa ilang balay.
Pulong niiya dayon gikubkob ang yuta og una niyang nakita ang iyang kaipon nga si Claire Dosdos, nga giprotektahan ang ilang ikaduhang anak nga masuso.
Matud ni Otero, nabantayan nila ning bag-o lang nga nagkaanam og dahili ang pundasyon sa yuta sa ubos nga bahin sa kural, apan wala silia mohikling kay nipasalig matud pa ang tag-iya sa yuta nga trabahoon ang riprap.
Sumala pa ni Otero nga ang mga trabahante igo rang magbangag og dili tiwason ang trabaho, unya kung adunay backhoe sa ibabaw nga bahin, mauyog ang yuta sa ubos.
“Wala ra sad siya (Dosdos) magkuan kay trabahoon na. Og magtrabaho sila diri mopahawa sad mi dili mi diha sud (sa balay), ari ra mi sa among silingan, di mi mokompiyansa basin matumpag,” sulti niya.
Ang Department of Social Welfare and Services nipahibawo kang Otero nga ang Kagamhanan sa Dakbayan maoy moabaga sa tanang balayranan hangtod malubong si Dosdos. (Renante Socia Lada)
(Source: Cebu City PIO)