Nihatag og pinansyal nga tabang ang Cebu Provincial Government ngadto sa 730 ka habal-habal drivers sa Southern Cebu kagahapon Abril 21, 2026. Matag drayber nakadawat og ₱3,000 aron makatabang sa ilang adlaw-adlaw nga panginabuhi.
Ang distribusyon sa ayuda gipangulohan sa Provincial Social Welfare and Development Office (PSWDO) uban sa mga Municipal Social Welfare offices sa Oslob, Boljoon, Alcoy, ug Dalaguete. Gihimo kini dungan sa lain-laing lungsod aron mas dali mahatagan ang mga benepisyaryo.
Sumala sa Kapitolyo, kabahin kini sa ilang programa aron matabangan ang mga transport workers nga naapektuhan sa pagsaka sa presyo sa gasolina. Daghang habal-habal drivers ang naglisod tungod sa mahal nga krudo ug ubang palaliton.
Gipadayag ni Gob. Pamela Baricuatro nga padayon ang ilang paningkamot sa pagtabang sa mga sektor nga naglisod. Iyang giingon nga naningkamot ang probinsya aron masiguro nga adunay suplay sa bugas ug gasolina samtang naghatag usab og mga programa alang sa katawhan.
Dako usab ang pasalamat sa mga drayber nga nakadawat sa ayuda. Matod pa sa usa ka benepisyaryo, dako kaayo kini nga tabang ilabi na kay dili na igo ang ilang kita sa adlaw-adlaw nga gasto. Ang mga opisyal sa probinsya nagpahinumdom nga ang maong ayuda gikan sa buhis sa katawhan ug gituyo aron makatabang sa tanang nanginahanglan.
Source: Cebu Province PIO
I via Renante Socia Lada