Nasakmit sa usa ka joint buy-bust operation ang duha ka kilo sa gituohang shabu nga adunay street drug price nga Php 13.6 milyon, kauban ang usa ka KG9 nga armas, usa ka magazine, og lima ka buhing bala, didto sa Barangay Pulpogan, Consolacion, Cebu.
Ang operasyon gipahigayon sa alas 3:20 sa hapon kaniadtong Disyembre 19, 2024, pinaagi sa koordinasyon sa mga operatiba sa MDEU Consolacion, Philippine Drug Enforcement Agency Regional Office 7 (PDEA RO7), ug Police Intelligence Unit (PIU).
Ang nasikop nga suspetsado mao si Jame Estenzo Lacang, 46 anyos, lumad nga taga Bohol ug nagpuyo sa Barangay Pulpogan, Consolacion.
Ang mga nakuha nga ebidensya kasamtangang gisusi ug gigamit aron mas mapalig-on ang kasong ipasaka batok sa suspek. Ang mga awtoridad usab nag-imbestigar sa posibleng koneksyon sa suspek sa dagkong grupo sa drogas ug armas sa rehiyon.
Ang maong operasyon nagpakita sa lig-on nga pagtinabangay tali sa mga yunit sa kapulisan ug PDEA alang sa pagbatok sa iligal nga drogas. Ang mga awtoridad nisaad nga magapadayon sa ilang kampanya aron mapugngan ang mga aktibidad sa iligal nga drogas sa Central Visayas.
Sa pagkakaron ang kaso giandam na alang sa pagpasaka sa korte batok sa suspetsado. (Renante Socia Lada)