Napamatud-an ang lig-on nga panaghiusa tali sa Cebu City Police Office (CCPO) ug komunidad human mokabat sa 16 ka nagkalain-laing pusil ang boluntaryong gitahan sa kapulisan sa Police Station 4 ug Police Station 8 niadtong Pebrero 27-28, 2025.
Kini nga mga armas gihatag alang sa temporaryong pagtipig samtang nagpadayon ang ilang renewal process, nga nagpakita sa aktibong paningkamot sa CCPO ilawom sa Oplan Katok—usa ka inisyatiba nga nag-awhag sa responsable nga pagpanag-iya og armas ug pag-monitor sa mga napasong nga lisensya.
Si PCOL Enrico E. Figueroa, ang Acting City Director sa CCPO, mipasabot nga padayon ang kampanya sa kapulisan aron mapalig-on ang kahapsay ug seguridad sa Cebu City, ilabi na kay nagkadool na ang National ug Local Elections sa 2025.
Tungod niini, mas mitaas ang pagsalig sa katawhan ngadto sa kapulisan.
Ang gitahan nga mga armas naglakip sa: 8 ka caliber 9mm nga pistola, 1 ka caliber .45 nga pistola nga adunay gun case, ug 7 ka shotgun.
Matod ni PBGEN Redrico A. Maranan, Regional Director sa Police Regional Office 7 (PRO-7), ang CCPO padayon nga nagpalig-on sa mga inisyatiba alang sa public safety ug crime prevention aron masiguro ang kaluwasan sa tanang Sugboanon.
Padayon ang panawagan sa kapulisan sa responsableng pagpanag-iya sa armas ug ang pagpakabana sa katawhan sa kalinaw ug seguridad. (Renante Socia Lada)
(Source: CCPO)