Usa ka kusog nga sunog ang miigo sa Sitio Mayflower, Barangay Duljo-Fatima, Cebu City, pasado alas 1:00 sa kadlawon, Disyembre 7, 2025, nga nakaapekto sa 17 ka balay. Tungod niini, 27 ka pamilya o 117 ka indibidwal ang napugos pagbakwit ug temporaryo nga gipapuyo sa Duljo Multipurpose Hall samtang naghulat og dugang tabang ug assessment gikan sa DSWD.
Sumala sa Cebu City Fire Station, dakong hagit ang pag-respondi sa insidente tungod sa hagip-ot nga dalan ug ka sikit-sikit sa mga balay sa maong lugar. Matud ni Senior Fire Officer 3 Wendell Villanueva nga mas maayo nalang kay adunay pipila ka balay nga adunay firewall nga nakapamenos sa pagkaylap sa kayo. Giisa ang alarma ngadto sa 3rd alarm mga ala 1:26 tungod sa kalig-on sa sunog.
Pasado alas 1:04 sa kadlawon nadawat sa Bureau of Fire Protection ang tawag sa sunog ug nakarespondi sila sulod sa unom ka minutos. Sa initial nga imbestigasyon, gituohan nga ang kayo nagsugod sa balay nga gipanag-iya ni Mario Enriquez, apan padayon pa kining gisuta aron maklaro ang hinungdan. Usa usab ka indibidwal ang nadisgrasya atol sa insidente.
Ang sunog midanyos og miabot sa ₱180,000. Nakuha sa mga bombero nga makontrolar ang sunog pasado alas 1:55 sa kadlawon ug hingpit nga napalong kini mga alas 2:13. Pasalamat usab sila nga walay dugang kaswalti nga natala gawas sa usa ka angol.
Padayon karon ang imbestigasyon sa Bureau of Fire Protection aron masuta ang tukmang hinungdan sa sunog ug mapalig-on ang fire safety sa komunidad aron malikayan ang susamang insidente sa umaabot.
📸 Contributed
I via Renante Socia Lada