Giaprobahan sa Provincial School Board (PSB) nga gipangulohan ni Gob. Pam Baricuatro ang ₱1.7 bilyon nga pondo para sa edukasyon sa unang miting karong 2026. Sa maong kantidad, mga ₱1.4 bilyon ang daling gigahin alang sa mga prayoridad nga programa ug proyekto sa mga eskwelahan sa probinsya.
Ang pondo gikan sa Special Education Fund (SEF) ug gamiton aron masulbad ang kakulang sa mga classroom, mapalambo ang mga gamit sa pagtuon, ug madugangan ang oportunidad sa mga estudyanteng Cebuano. Lakip sa pinakadako nga gigahin mao ang ₱700 milyon para sa pagtukod og “smart classrooms” aron mas moderno ug teknolohiya ang paagi sa pagtudlo.
Gihatagan usab og ₱295.9 milyon ang pagtukod og Temporary Learning Shelters (TLS) isip puli sa mga classroom nga nadaot sa linog niadtong 2025. Sumala sa Department of Education-7, adunay 269 ka classroom ang nadaot base usab sa report sa Capitol.
Giaprubahan sab ang ₱335.9 milyon para sa school supplies, instructional materials ug uban pang panginahanglanon sa mga estudyante gikan Kindergarten hangtod Grade 12. Aduna pay laing pondo sama sa ₱13 milyon para armchairs, ₱10 milyon para sports equipment, ₱3.48 milyon para ukulele sa early childhood education, ug ₱30 milyon para sa literacy ug numeracy recovery programs, lakip na ang training sa mga magtutudlo.
Gipasabot ni Gob. Baricuatro nga ang edukasyon mao ang pundasyon sa kaugmaon sa probinsya. Matod niya, padayon nga makigtambayayong ang probinsyal nga gobyerno sa DepEd aron masiguro nga hustong magamit ang pondo ug walay estudyanteng mabiyaan. Ang maong pag-aprubar sa budget nagpakita nga prayoridad sa probinsya ang kalidad ug accessible nga edukasyon alang sa tanang kabataan.
Source: Cebu Province PIO
I via Renante Socia Lada