Nakigpulong si Gob. Pamela Baricuatro uban sa laing opisyal sa probinsya ngadto sa Department of Budget and Management (DBM) aron hisgutan ang plano nga ₱360 milyon nga pondo alang sa mga proyekto sa imprastruktura sa Cebu. Apil sa mitambong sila Privincial Administrator Ace Durano ug ubang key officials sa Kapitolyo.
Sa maong tigum uban ni DBM Secretary nga si Roland Toledo, gihisgutan ang mga detalye sa pondo ubos sa Local Government Support Fund. Human sa panagpulong, gisaad sa DBM nga suportahan ang maong alokasyon aron mapadayon ang mga proyekto sa probinsya.
Gipahibalo usab ni Gob. Baricuatro nga adunay dugang nga mga proyekto sa imprastruktura nga ilang gisumiter sa DBM karong semanaha. Kini nga mga proyekto susihon ug aprubahan pa sa ahensya aron mahibal-an kung unsa ang unahon.
Sumala sa DBM, andam silang maghatag pa og dugang pondo ilabi na sa pagtukod ug pag-ayo sa mga eskwelahan ug dalan nga nadaot sa linog niadtong Septyembre 30, 2025. Ilang tan-awon ang listahan sa mga proyekto aron mapili kung asa ang pinakaimportante nga suportahan.
Dugang pa, gawas sa ₱720 milyon nga tabang alang sa bugas ug imprastruktura, miabot na sa halos ₱1.2 bilyon ang total nga pondo nga nadawat sa probinsya sa Cebu gikan sa national government karong tuiga. Nagpasabot kini nga padayon ang suporta sa gobyerno alang sa kalamboan sa probinsya.
Source: Cebu Province PIO
I via Renante Socia Lada