CAGAYAN DE ORO CITY- Gipun-an sa city government sa Cagayan de Oro ang isolation units niini ngadto na sa 28 ka buok nga adunay bed capacity nga usa ka libo agig pagpangandam sa dugang mamauli na nga kagay-anons ug tungod sa pagsaka sa kaso sa Covid-19 gumikan sa improved testing capability niini.
Matud pa ni Mayor Oscar Moreno, responsibilidad sa lokal nga kagamhanan nga kon kinsa man kadtong mamauli sa ilang pinuy-anan mahatagan sa pag atiman sa City Isolation Units ug ma test sa dili pa sila hingpit mamauli sa ilang pinuy-anan aron pagseguro nga dili mokuyanap ang Covid-19 virus.
Gisugilon ni Rhyselle Descallar, CIU manager nga ang isolation facilities kompleto sa kahimanan ug gidumala sa mga health workers ug volunteers. Matud niya, ang city government naggahin sa igong pundo alang sa akomodasyon, pagkaon, medical ug psychosocial interventions ug uban pa.
-Gin B. Serohijos-