Nunot sa kasaulogan sa 26th Consumer Welfare Month karong bulana, ang Cagayan de Oro City Price Coordinating Council (CDO CPCC) nagpahigayon og random inspection sa mga timbangan sulod sa Cogon Market, Martes, Oktubre 17, 2023.
Mokabat 16 ka mga stalls sa Wet Section, Fruits & Vegetable Section, ingon man 18 ka mga timbangan ang gisusi ug gi-calibrate sa Team, diin tulo ka mga timbangan ang gi-confiscate kay dili insakto ang timbang samtang ang uban depektuso.
Ang random inspection gipangulohan ni CPCC co-chairman Atty. Jose Edgardo Uy uban sa Department of Trade and Industry-Misamis Oriental Provincial Office, City Economic Enterprises and Business Development Administration (CEEBDA), ug City Finance Office.
Gipasabot ni Atty. Uy nga tumong sa maong kalihokan nga mapanalipdan ang mga konsumante ug anaay gobyerno nga nagtan-aw sa ilang welfare diin masiguro nga tukma sa ilang gibayad ang produkto nga ilang gipalit.
Lakip sa gisusi ang mga business permit aron masiguro nga tukma ang ilang gibaligya sigun sa nabutang sa ilang business permit.
Hinuon, mapasalamaton si Atty. Uy kay sa mga nasusi mas daghan gihapon ang compliant ug nagtuman sa insaktong timbang sa ilang mga baligya ngadto sa mga konsumante.
Dugang ni Atty. Uy nga batasanon usab sa mga konsumante nga ipatimbang sa Timbangan ng Bayan ang ilang napalit nga karne, isda, prutas ug gulay ilabina kon aduna silay pagduda sa timbang.
Ang Timbangan ng Bayan makita sa dalan JR Borja nga entrance ug Yacapin nga entrance sa maong merkado.
News and photo courtesy of CIO CDO