GISUGDAN na sa administrasyon ni Mayor Rolando “Klarex” Uy ang pagtrabaho sa Cagayan de Oro City College sa Brgy Dansolihon adlaw’ng Martes, Hulyo 25 pinaagi sa ritual sa pagbukas sa dalan padulong sa maong tunghaan.
Kauban si Dr. Alice Anghay, focal person on Education ning syudad ug executive director sa Local School Board, Officer-in-Charge sa CDO City College nga si Ms. Maria Victoria Trinidad, mga kadagkoan sa City Engineering Office, City Equipment Depot, ug mga sakop sa Nahilaran Indigenous People nga midonar sa 65 ektarya nga luna kang Mayor Klarex alang sa katukoran sa city college.
Si Baylan Eduardo Hagonao o Datu Tumanodan maoy nangulo sa ritual sa tinguha nga luwas ug mabungahon ang katuyoan sa syudad alang sa kalamboan sa edukasyon ilabina sa mga nanimuyo duol ug kasikbit sa Brgy Dansolihon.
Kahinumdoman nga laraw ni Mayor Klarex nga masugdan na ang city college sa dili pa matapos ang unang tuig sa iyang termino aron mas daghan pang kabatan-onan ang makatapos sa ilang pagtuon ug maabot ang ilang mga pangandoy sa kinabuhi.
Usa ang agrikultura sa mga nag-unang kurso nga itanyag sa Cagayan de Oro City College.
News and photo courtesy of CIO CDO